Phile | KMH | STEP |

PIYLIYMON Pol, Piyliymon Nup Minj Tikak

Minim Nind Niŋep

Baybol buk day “Piyliymon” apun biy, Pol buŋgiy nuk Piyliymon nup tikak. Bi kun ak Krays nup chiŋgak ak; mindyiŋgip miñmon Kolosiy. Piyliymon nuk bi bap tawiy dap ayek, nup yikop woŋg giyiŋgip. Bi kun ak yimb nuk Oniysmas. Pen kisen bi Oniysmas kun ak Piyliymon nup kirgiy, pirik am Pol kalambis mindek ak amek, nup Jiysis chinup aŋgiy kumak minim tep ak aŋgñak. Aŋgñek, Jiysis nup gosimb niŋiy chiŋgek, minj kun biy tikiy, Oniysmas nup ñiy aŋgak, “Dam Piyliymon nup ñinimin aŋgak.”

Minim Ar Keykey Mindip Rek:

Minim nind aŋgak ak mindip, 1-3.
Pol, Piyliymon giyiŋgip rek niŋiy, yimb nup dand aranak minim ak mindip, 4-7.
Piyliymon, Oniysmas nup tip ak dinimin aŋgak minim ak mindip, 8-22.
Minim aŋg jiwyiŋg, “Nimb mindpim” aŋgak minim day ak mindip, 23-25.

Philemon

1 Yand Pol. Jiysis Krays nup woŋg gen yip kalambis ayey mindpiyn. Mam tep yand Piyliymon; chir woŋg jimñiy gipur. Yand mam chin Timotiy yip mindiy, nimbip minj tiksipur. Nand ak, ay chin Apiya ak, bi Gor woŋg kilis giy gip Akiypas ak, biynimb korip nand apiy lotiw gipim gok maŋgiysek, nimbip minj tiksipur.

3 Gor apiymiŋay nimbip kond minder, ñin ar kiy apiymiŋay ak mindiy, mindrep ginimimb.

Gor Nup Gosimb Niŋyiŋg, Biynimb Wasemb Aypan Aŋgak

4 Nand Gor Ñinuk nup gosimb niŋyiŋg, biynimb nuk gok kuyip wasemb aypan ak; per Gor nup aŋgniŋyiŋg, tep apiyn. 6 Nup apiyn, “Bapiy. Chin Piyliymon yip minim aŋg amiy apiy giy mey, chinup biynimb nip ker mindpun gok, yerer gipan ak niŋrep giy, nip chiŋgrep yimb ginimuŋ apiyn.”

7 Pen mam Piyliymon niŋan! Nand Gor biynimb nuk gok kuyip wasemb aypan ak, kuyip tep gip. Yand kunep niŋen tep gek, miñmiñ gipiyn.

Oniysmas Nup Miluk Ma Niŋnimin

8 Pen Jiysis minim aŋgñi taŋgen, yip kalambis ayey mindpiyn ak; yip simb niŋiy aŋgnim rek ginimin. Krays binuk mindpiyn rek, nip minim kilis aŋgniŋg apnip ak pen, nand bi mapin yand ak, nip kun ma aŋgnim aŋgiy kirpiyn. 10 Pen minim yand ak, ñi Oniysmas nup ma aŋg ginimin. Nip woŋg giy kiriŋg amnak ak, miñiy yand kalambis mindiy, Gor minim tep ak aŋgñen niŋimb ak mey, nup minj sek yoksipiyn. 11 Nip kiriŋg amnak ak pen, miñiy yip kond mindiy, nip kond mindiy giniŋgamb.

12 Pen ñi mapin yand rek ak nip yoksipiyn. 13 Nind aŋgniŋiy minim nip ak diy rek, nup ma yokpinip. Krays minim tep aŋgen, yip kalambis ayey mindpiyn biy, nand ap yip kond mindenimin rek ma ayip ak; Oniysmas yip kond mindombikop. 14 Pen yand key nup di mindeniŋgayn yipund ma giniŋgamb aŋgiy, nup nind yokiy, nip kisen aŋgniŋsipiyn. Yip ker tip yokniŋg yoknimin. 15 Yand aŋgniŋbiyn-eŋ Gor gek, Oniysmas nip kirgiy amimb ak mey, miñiy perper chiŋgiy mindeniŋgayr. 16 Bi yikop woŋg giñemb rek ma mindeniŋgamb; nuk miñiy mam chir omiŋal yipund giy ak, nip chiŋgiy mindeniŋgamb. Nup bi woŋg giñemb rek ma niŋniŋgamban; nuk Gor binuk bap, namam nand key ak rek mapin niŋniŋgamban. 17 Kun ak yip buŋgiy yand yimb aŋgiy niŋban rek, ñi Oniysmas nup aŋg giyn aŋgiy ma aŋgnimin. Nup direp ginimin. Yand amjaken, yip direp gipnap rek ak, nup ginimin. 18 Pen nip timey gak akaŋ, tap gunap pen ma ñak aŋgiy, minim gunap mindonimuŋ nup ma aŋgnimin; minim kun ak yip aŋgnimin. Aŋgey, yand nip pen ñiniŋgayn. 19 Niŋind apiyn rek, yimb yand ak aŋgiy, minj sek tikiy aysipiyn. Pen yand nep Gor minim tep aŋgenik niŋban ak, nip ma aspiyn; nand key niŋban. 20 Mam. Krays chirupmiŋay direp gip rek nip aspiyn: Oniysmas nup ma aŋg ginimin. Yip simb niŋiy ak, nup direp ginimin. 21 Apiyn rek, nup direp giniŋgamban aŋgiy, tep gakniŋ minj tiksipiyn.

22 Minim nokom bap mindip ak ma apiyn. Yip korip ñiluk miŋgan bap niŋiy gayrep genimin; Gor nup aŋgniŋban rek, maŋ mindip kalambis kirgiy, ninim rek ayip.

Minim Aŋgjiwak

23 Binak Epapras kunep Gor minim aŋgñek, nup kalambis ayeyak, yand yip mindpur biy. Nuk “Nip mindpan?” aŋgip. 24 Bi woŋg jimñiy gipun Mak ak, Ariystakas ak, Demas ak, Luk ak “Nip mindpan?” apay. 25 Jiysis Krays nip kond mindakniŋ, Gor nup gosimb niŋyiŋg mindenimin.